陳健安化身暖男店長 On仔揚言朱古力與腹肌:兩樣都要
娛樂
發布時間: 2022/09/18 16:28
最後更新: 2022/09/18 22:13
上月剛推出新單曲《創作者的派對》的C AllStar成員陳健安(On仔)於MV中大騷肌肉,今日(9月18日)以「一日店長」身份現身商場,跟隨卡通角色Kaka暢遊朱古力世界大道。
他表示:「之前為咗MV操肌要戒口同節食,收到今次嘅活動邀請即刻SAY YES,實行拎正牌食朱古力!食完最多加強操練,朱古力要食,腹部嘅『朱古力』都要繼續keep!」
On仔鐘情朱古力
On仔去到多個朱古力主題打卡位拍照,一見到由朱古力製作的2件1米高「Kaka的朱古力樂園」雕塑,即被深深吸引住,看得目瞪口呆。
他笑言:「邊個話鐘意朱古力係女士專利?朱古力可以話係我嘅精神食糧。如果可以,活動完結後都想帶埋個朱古力雕塑返屋企做擺設,難以想像點用朱古力整到咁精緻嘅作品!」
On仔隨後化身暖男店長,於「朱古力自由斟」為早早到達現場期待多時的粉絲,親自調配獨一無二的朱古力飲品。他一邊製作一邊說:「8款材料揀到我心大心細!係用我自己嘅喜好嚟配搭,寫包單好味,希望Fans鍾意啦!」On仔更逐一在杯身簽名,展示滿分的親和力,為粉絲締造甜到入心的開心回憶。
最新影片推介:樊亦敏專訪
撰文 : TOPick柴犬出動